ما الجامعة الا غرفة نوم كبيرة

اعلن اساتذة المواشي بسوق العبور وتجار الجامعات المصرية ومومياوات المراكز البحثية ظهور حالة غريبة من انعدام الادراك اللاشعورى الناتج عن التهاب كابل الداتا لدى الشعب المصري واطلقوا عليه تربنة الدماغ او تهييس النظام فى العظام.

يعني الواحد يكون داخل الحمام يلاقى نفسه فى نص الشارع ولا البنت تكون داخلة اوضة النوم تلاقى نفسها فى قلب الجامعة .. ولا تكون رايح القاهرة تلاقى نفسك فى حلوان .. حالة من التربنة الدماغية الفظيعة (اللهم احفظنا)

وأمثلة على هذه الحالة الفريدة من نوعها ان الشاب مثلا يكون داخل الحمام (عادى زي الناس) وعلى حين غفلة من امره تلعب التربنه الدماغية لعبتها فيكتشف انه مش فى الحمام وانه فى قارعة الطريق .. فيصاب بصدمه تدخله فى حالة من الغيبوبة اللاشعورية تجعله يخرج هائما على وجهه متسربعا .. ولان المسكين مالحقش يظبط البنطلون بسبب نوبة اللاوعي المفاجأة فتلاقى البنطلون ساقط منه ووسط البنطلون واقع فى ركبته من الخضة وحاجات مشجرة وكاروه بتعلن عن نفسها بتحدي أوه .. أوه ولا سمنة روابي .. وبدلا من ان ينبهه احد زملائه لفضيحة الكاروه المشجر الا انهم يظنوها موضة ويتسابق الجميع فى التقليد الاعمى.

ولم يتوقف الوباء على الفتيان فقط الا ان الفتيات ايضا اصابهن الداء اللعين .. الذي انتشر فيهن انتشار الوورم فى هارد مية وستين .. فنجد الفتاة بملابس النوم فى الشارع و بالحجاب وهى بتغسل الصحون بفيري قاهر الدهون .. فالبنت المسكينة تلبس اللانجيري ذو الالوان البراقة احمر .. اخضر .. اصفر .. ينفع في شتا او صيف .. هو ايه ؟! .. اللانجيري طبعا .. ماهي في البيت ولانها حشمة ومحترمة فترتدي بودي أبلة كارينا الله يعمر بيتها وبنتاكور ليكرا ماركة الحاجة مفتقة الملزقة تحت اللانجيري او الديكولتيه وده موضة عصر الدينازور العريان بتوصيات من ابلة امينة لبـَاية ملكة جمال الصومال وزيمبابوى فى عام المجاعة الكبري .. ولو محجبة ومحتشمة تديها بنطلون الاسطى جينز على نفس قميص النوم سالف الذكر .... وبعدين تدي وشها تعفيرة بودرة تلك خمس خمسات معتبرة تبقى ولا بياض التلج .. على لطشتين روج اجو .. على خطين أي لاينر .. وشويتين مسخرة علي شويتين سنفرة تبقى ولا اجدعها بلياتشو .. ثم تدخل اوضة النوم فتحدث حالة التربنة الدماغية سالفة الذكر فتجد نفسها في الجامعة .. فينبهر المارة ويقولوا واو فنتاستيك وبدلا من ان تنبهها احدى زميلاتها بانها فى الشارع مش فى اوضة النوم .. يـُعجبن بالفكرة ويقلدنها .. واهى ديه الموضة يا ماما .. الا صحيح هي فين الماما ؟!

___

وصدق الشاعر القائل حين قال :


ما الجامعة الا غرفة نوم كبيرة

في دولابها بنطلون احواله غريبة

شوية واقع غرقان فى مارينا

-----

وشوية لازق يتلبس بصابونة

وفيها الديكولتيه موضة و تقليعة

و البودى والبنتاكور ستر وقيمة

وربنا يخليلنا أبلة كارينا

كاسية بناتنا وساترة عاهتنا

ومش عايزهم يتجوزوا عـُرفى يا افندينا؟!

ملحوظة : أعتذر عن الالفاظ الغير لائقة بالبوست .. لكن لم اجد بقاموسي كلمات لائقة تصف المناظر الغير لائقة التى نراها بالجامعات .. و أعتذر عن عدم وضع صورة للبوست .. لانها كانت هتبقى صورة غير لائقة برضو .. واطلق لخيالك الجامح العنان لتتخيل الصورة اللائقة .