يُحكي انه في يوم من ذوات اليوم .. يوم عمره بضعة اعوام .. كنت في المرحلة الثانوية .. وبالاخص في السنة النهائية .. طالبة بالشعبة العلمية .. وكان من طقوسنا المدرسية اليومية .. حفلة تأبينية صباحية .. تبتدي بآيات من الذكر الحكيم وتنتهي بتحية ام المصريين .. ولي مع هذه التحية يوم أليم .
فبأذاعتنا الصباحية يصطف الجميع بالفناء والجميع هذا عدد ليس بالقليل يبلغ قرابة الالفين من البنات الامامير .. بالميمنه بالقرب من البوابة وبمواجهة مكتب الادارة كان يقبع فتيات الشعبة العلمية حيث الالتزام والادب والجدية فهن خير واجهة امام الزوار وبالميسرة حيث الحمامات وغرفة تغيير ملابس الالعاب – وهذه احيانا تنقلب لكوشة وتسمع منها زغاريد واحيانا ردح وهوشة – كان يقبع فتيات القسم الادبي ودول اخر مسخرة فلا يعترفن بشيء اسمه طابور الصباح ويقف بعضهن تجمعات والبعض الاخر قرفصاء وماحدش يعرف يبؤ فيهم(أي يكلمهم باللغة البلتجية القديمة) من المدرسات وبالوسط يرقد كنارية الصف الاول والثاني.
ولان مدرستي مدرسة غير عادية يجتمع فيها الهلال بالنجمه الدهبية فقد افتت كبيرة احدى الجماعات المتطرفة بالمدرسة بان تحية العلم
حرام
حرااااااام
حراااااااااااااااام
وازاي يا معاتيه تحيوا حتة خشبة ملفوفة بقماشة معفنة (اللي هو العلم يعني ).. والتحيات لا تقرأ الا فى وسط وختام الصلاة .. فالتحيات لله والصلاوات والطيبات والتحيات لغير الله
باطل
باااااطل
بااااااااطل
فقولتلها والله يااختي وما ليكي عليه حلفان .. انا كدا كدا ماكنتش بحييها .. ولا عاجبني اصلا وقفة الحال اللي ع الصبح ديه .. ورغم اني كنت علمي الا ان صحباتي كانوا ادبي .. وبصراحة هم كانوا ذووووووق ولما بروح عندهم في المسخرة (الميسرة) بيعملوا معايا احلي واجب فكنت مرابطة عندهم اشرب الكابتشينو بتاعي اللي بيعملوه على لهب بنزن (موقد مسروق من معمل الكيميا) في اوضة تغيير الملابس واقعد علي الديسكات المكسرة اللي هناك اقزقز لب معززة مكرمة وسايبة المـٌلك لصاحبه .. وسيباكم تهرتلوا ع الصبح مش ناقصة قلبة دماغ ودوالي مبكرة من الوقفة .. والواحدة عندها ايه غير صحتها تحافظ عليها .. فكنت ولله الحمد الحاضر الغائب في طابور الصباح .
ولان البنات لوك لوك مابيتبلش في بوقهم فولة (وانتم سيد العارفين ) .. فقد انتشرت الفتوى في المدرسة انتشار الدودة في البرسيم .. وفي يوم بائس حزين طلعتله شمس حامية اوي .. قرر الجميع اعلان العصيان الفظيع .. وبعدما انتهت الاذاعة الصباحية .. وطلع عدد 1 اوز بلدي و جوز بط كيني يتبختروا وبيحيوا العلم .. وبيسرسعوا تحيا جمهورية مصر العربية .. ماحدش رد .. طيب تحيا جمهورية القاهرة العظمي .. ماحدش نطق .. طيب يحيا شارع محمد علي .. هنا نطق عم محمد ( ناظر المدرسة) .. واستلم المايك .. وقعد ساعتين المفتري يشتم فينا ويصرخ ويقول
ولان البنات لوك لوك مابيتبلش في بوقهم فولة (وانتم سيد العارفين ) .. فقد انتشرت الفتوى في المدرسة انتشار الدودة في البرسيم .. وفي يوم بائس حزين طلعتله شمس حامية اوي .. قرر الجميع اعلان العصيان الفظيع .. وبعدما انتهت الاذاعة الصباحية .. وطلع عدد 1 اوز بلدي و جوز بط كيني يتبختروا وبيحيوا العلم .. وبيسرسعوا تحيا جمهورية مصر العربية .. ماحدش رد .. طيب تحيا جمهورية القاهرة العظمي .. ماحدش نطق .. طيب يحيا شارع محمد علي .. هنا نطق عم محمد ( ناظر المدرسة) .. واستلم المايك .. وقعد ساعتين المفتري يشتم فينا ويصرخ ويقول
الانتـ مااااااء
الانتـ مااااااااااااااء
الانتـ ماااااااااااااااااااااااء
مااااء
ماااااااااء
ماااااااااااااااااااء
يا عديمي الانتـ مااااااااااااء
مصر ديه اللي بتأكلكم .. مصر ديه اللي بتشربكم .. مصر ديه اللي كانت بتغييرلكم البامبرز .. وانا اتلف ابص ع البيوت اللي حوالينا الاقي الناس كلها طالعه من الشبابيك تتفرج علينا واحنا بنتهزأ .. واقول الله يخربيتك هزأتنا في المنطقة .. وبعد ما خد راحته فى القاء دروس التربية الوطنية والقومية بالطريقة الردحية ( لأم الدرداح ) .. لاقيت ام عصام (مديرة المدرسة) طلعت وقعدوا يوشوشوا بعض .. وانا شوفت المنظر وقولت بس طالما ذات الرداء الاسوس طلعت يبقي اليوم ده مش هيعدي علي خير .. وقد كان .
قرروا تذنيبنا طول اليوم من الساعه سابعة الصبح لحد تلاته العصر في الشمس الحارقة وممنوع حد يروح الحمام .. وممنوع حد يقعد .. وممنوع حد يكلم التاني وانتشر زبانية العذاب (المدرسات) عمالين يبستفوا فينا (علشانك يا مصر) .. وجيران المنطقة شمتانه فينا والكل بيبص من البلكونات والشبابيك .. وكل اللي معاه كاميرا بيصور(فرصة بقى) .. واتصلوا بالسي ان ان علشان تصور الحدث لكن ربنا سترها معانا وطلعت مشغولة عند الكوافير .. واول ما رن جرس الانصراف ولاول مرة في تاريخ التعليم المصري مايخرجش الطلبة يجروا من الفصول .. احنا خرّينا ع الارض(الفعل الماضي من خرّ أي اتهبد ع الارض وذلك من قاموس آه يا لالالي لابن اللالي ) والبعض الاخر جري ع الحمام (الزنقة وحشة واحنا كنا في العراء ) .. واول ما التقطنا انفاسنا طلعنا نجري قبل مايفتكرولنا أي مصيبة تانية يعاقبونا عليها .
وانا ماشية مع صحبتي بنعرج بقولها يا ساتر علي قلبهم الاسود كل ده علشان ماحييناش العلم .. امال لو كنا بنسرق وننهب فيكي يا مصر كان اتعمل فينا ايه .. ردت صديقتي الانتيخ وقالت كانوا عملونا اعضاء مجلس شعب .
قرروا تذنيبنا طول اليوم من الساعه سابعة الصبح لحد تلاته العصر في الشمس الحارقة وممنوع حد يروح الحمام .. وممنوع حد يقعد .. وممنوع حد يكلم التاني وانتشر زبانية العذاب (المدرسات) عمالين يبستفوا فينا (علشانك يا مصر) .. وجيران المنطقة شمتانه فينا والكل بيبص من البلكونات والشبابيك .. وكل اللي معاه كاميرا بيصور(فرصة بقى) .. واتصلوا بالسي ان ان علشان تصور الحدث لكن ربنا سترها معانا وطلعت مشغولة عند الكوافير .. واول ما رن جرس الانصراف ولاول مرة في تاريخ التعليم المصري مايخرجش الطلبة يجروا من الفصول .. احنا خرّينا ع الارض(الفعل الماضي من خرّ أي اتهبد ع الارض وذلك من قاموس آه يا لالالي لابن اللالي ) والبعض الاخر جري ع الحمام (الزنقة وحشة واحنا كنا في العراء ) .. واول ما التقطنا انفاسنا طلعنا نجري قبل مايفتكرولنا أي مصيبة تانية يعاقبونا عليها .
وانا ماشية مع صحبتي بنعرج بقولها يا ساتر علي قلبهم الاسود كل ده علشان ماحييناش العلم .. امال لو كنا بنسرق وننهب فيكي يا مصر كان اتعمل فينا ايه .. ردت صديقتي الانتيخ وقالت كانوا عملونا اعضاء مجلس شعب .
-----
ملحوظة : بشأن فتوى تحية العلم بالمدارس والجيش فقد اختلف فيها الفقهاء اختلاف شديد
ولكن لازلنا نردد هذه التعويذة كببغاوات وهي لا تعبر عن انتماء بل بلاهة واضاعة وقت النشاط الذهني بفترة الصباح في موروثات بالية.
المشاركات
هناك 17 تعليقًا:
ههههههههههه
والله بوست من اجمل البوستات اللى قريتها
هى صحيح تحية العلم حرام ؟؟
او على الاقل عديمة القيمة
؟؟
انا عمرى ما فكرت فى الموضوع ده
تقديرى ومحبتى
هههههههههههههههههههه
البوست ده جامد جداا جداا جداا
بجد اسلوبك فووق الراائع
اه بالنسبه لموضوع تحيه العلم انا كنت بتبسط اووي وانا بحييه مش عارفه ليه كنت بفتكر ان كل ما كان صوتي عالي ده معناه اني بحب مصر اووي
علي العموم الحمد لله الكليات مفيهاش طوابير
و شكراا مره تانيه علي البوست
ماشاء الله البوست جميل جدا
وعلى العموم أنا مكنتش بأردد تحية
العلم وراء التى بتقول كنت بأطنش
وشكرا على المعلومات ......
سندس
هههههههههههههههههههههههههههههه
لا بجد أنتى مشكلة ..بوست معدى فعلا
أنا أول مرة أسمع عن حكاية الحرام و الحلال دى ..بس اللى أعرفه إنى آخر مرة حيت فيها العلم لما كنت فى خامسة إبتدائى و بعد كدة و لا كنت بعبر الطابور أصلا لأنه حاجة تستفز بجد و ملهاش أى لزمة بالذات تحية العلم دى
هههههههههههههه
البوست دمه خفيف أوى
انا مكنتش بحيي العلم عشان انا كنت من الناس اللى بيساهموا فى تعذيب الطلبة على الصبح كدة
اللى بيسموهم الإذاعة المدرسية
اظن تحية العلم دى بتحصل فى كل دول العالم (العتبة - ميدان عابدين - الديزة)
بس فى ناس من حقهم يحيوا بلدهم كل يوم الصبح عشان اللى بيشوفوه فيها
لكن ازاى الواحد من دول يحس بالانتـ مااااء اللى بيقولو عليه ده و هو بيشوف ابوه كل يوم بيرجع من الشغل يسب و يلعن فى البلد و اللى فيها من القرف اللى شايفة طول النهار
زيها زى الأغنية الكوميدية "مشربتش من نيلها" اللى كل ما حد يسمعها يقول طبعا دا انا شربت و كلت (و هو بيحسس على اسفل عنقه من الخلف )
اه دائما نرردها فقط لانها تعود وتقليد
لما اشعر بيها يوما
بل كان دئما هذا العلم الذى نحيه متدلي ومتسخ احسسته دائما مهزومه لم يكن يوما شامخا يرفف بشموخ كما نراه فى الافلام
تحياتى على اسلوبك الرائع
وقفت عند حتة الأنتماااااااء دى وقعدت أضحك ضحك بجد مضحكتوش من زمان. مش عارف ليه افتكرت استاذ أبو سريع ناظر مدرستنا وتخيلت ان هو اللى عمال يقول إنتمااااااااء. بس والله الناس دى كانت مقتنعه بالكلام ده وكانوا بيقولوه من كل قلبهم بإخلاص. عموما القضيه خلاص محلوله لأن الجيل الحالى من المدرسين انشاء الله لما يوصلوا لدرجة مديرين مش حيعرفوا يتكلموا عن الإنتماء ومش بعيد هم اللى يروحوا يشربوا الكابتشينو فى الميسره وقت تحية العلم. عموما تأكدى ان الموضوع ده لو إتكرر الايام دى مش حيحصل تعذيب بالشكل ده تانى والموضوع حيعدى على خير قوى جدا خالص.....شكرا
اول مرة ازور المدونه وفؤجئت بحكاية العلم دى
والحقيقة هو الكلام جميل ونقل حالة فصام شبابى عن كل ماهو يسمى وطنية او قدوة وعلى رايك كله فى البلاله
ومش قادرين لحد دلوقتى
انى لما نختلف يكون فى اسلوب منظم للاختلاف
يعنى مثلا فى هذه الحالة الجميله
نروح نسئل ونعرف يمكن يكون هناك اجابات مقنعة
بس ساعات يا ست الحلوين
الواحد بيكون عامل القفل السرى لعقله
ومش هايعطى دماغه لحد مهما قال من كلام مقنع
وهكذا
تحياتى
وانا ليا موضوع بعنوان العلم فى مدونتى لعل وعسى يفيد لو قرائتيه
السلام عليكم كلامك خفيف بس انا زعلت لما قلتى على الادبى ناس مسخرة مين قال كدة ان كنت ادبى وكنت بذاكر عشان اجيب مجموع ومكنش فى مسخرة وعلى العموم انا اسعدنى زيارتك
احمد الشاعر
مدونتك حلوة جدا ودمها خفيف
ازاي معرفتهاش من زمان بس
هههههههههههههههههههه والله البوست توووووووووحفة جداا انا عمري ما ركزت في الاذاعة المدرسية وكنت بحضر الطابور غصب عشان كان في عيال رخمة بتنزلنا من الفصول وكانت الناظرة شديدة شديدة يعني وكنت برضو مبرددش تحية العلم او ممكن لو حظي جابني ووقفت في اول الطابور اعمل نفسي بحرك شفايفي وخلاص ياااااااااااااه فكرتيني بالذي مضي لما نزلت بقي التربية العملي وكنا بنقف في الطابور كنا بنبهدل العيال علي عدم تركيزهم في اللي بيتقال لكن دا كان غصب عننا لان مديرة المدرسة كانت بتبقي واقفة تزغرلنا فكنا بنمثل اننا بنزعق للعيال وتلفت عينها من علينا نقف نرغي مع بعض بس عمر الانتماء ما كان مجرد كلام بنردده وخلاص ...
جميل الموضوع ده فعلا ومعاكي حق...تحيه العلم وطابور الصباح دول مضيعه لوقت ..وملهمش اي لزمه
واول مره اسمع انها حرام.!
بوست رائع ودمه خفيف اوى
بس بالنسبالى انا كنت معظم الايام ببقى فى الاذاعه المدرسيه وفى الضل بقا ومسترح واخر حلاوه ههههه
اما لو حصلت ومكنتش فى الاذاعه مكنتش بحييه بصراحه
احنا خرّينا ع الارض(الفعل الماضي من خرّ أي اتهبد ع الارض وذلك من قاموس آه يا لالالي لابن اللالي ) والبعض الاخر جري ع الحمام (الزنقة وحشة واحنا كنا في العراء ) .. واول ما التقطنا انفاسنا طلعنا نجري قبل مايفتكرولنا أي مصيبة تانية يعاقبونا عليها .
وانتي كنت من أي فريق فيهم يا بسبوسة؟
يعني جريتي على أي مكان بالضبط؟
أصل البوست ده مبين انك كنتي دماااااااااغ
بس رجلك جت في الفخ برضه رغم إنك سوسة :)
بجد بجد بجد
أحلى موضوع قريتهولك
سامعه تسقيفي ؟؟؟؟؟
كل سنه وانتي طيبه
فين الف ليله وليله صحيح؟؟؟؟
سلاموووووووووووووز
استدراك
مش معنى اني قلت ان الموضوع ده احلى موضوع قريتهولك اني باقلل من باقي مواضيعك
بالعكس
بس انا شايفك تفوقتي على نفسك بكل الاساليب
واتناولتي موضوع جديد بطريقه ماحدش اتناولها
وده المهم .. التناول
وكل سنه وانتي طيبه كمان مره
فين العيديه ؟؟؟؟
سلاموووووووووووز
والله روعه الأسلوب بجد
من زمان مقرأتش حاجه حلوة كدا
تسلم ايديكي..
إرسال تعليق